ما...واقع الكترونيه - حسن ناجي

شمس الاردن :- سقا الله على أيام زمان ، وقعدات زمان ، سقا الله على مصطبة الدار وحوش الدار ، سقا الله على سوالف الحصيده ، وسوالف النسوان ، ويا حيف على هالوقت اللي وصلنالو ، ولو نرجع لورا شوي ، ونستعيد هاللي كانت الزلم تحكيه أيام الحصيده عن الغله ، والمطر ، والخير ، عن ابن فاطمه اليتيم وكيف ممكن يساعدوه ، وعن ابن ابو محمود اللي بدو يتجوز على البيدر وكيف ممكن يوقفو معاه ، والنسوان قاعدات على المصطبه بسولفن عن إلهام المعدله وصاينه بيتها وجوزها ، وعن خديجه اللي ما بتعرف تقلي بيضا لإنو أمها ما علمتها ، مسكينه ماتت وهي زغيره ، وعن أم مازن الأرمله اللي ربت ولادها وعلمتهم وصارو ظباط بالجيش العربي ، وطبعاً في حكي شروي غروي وفايت في بعضه ، لكن ما في تجريح بحدا ، الناس كانت تحب بعض ، ويزقفو للشاطر والناجح ، ويزعلو من الولد او الزلمه الهموله .

اليوم والحمد لله صار عنا علم كوام كوام ، والتكنولوجيا حبطرش ، وصرنا نكتب ونحكي صوت وصوره لكن بطريقه غلط ما فيها محبه وكلها تجريح ، وقبل خمسين سنه كان عنا جرايد واذاعه ، وقايمين بدورهم الوطني والاجتماعي ، واليوم إجانا زياده عليهم هالفضائيات والمواقع الالكترونيه اللي استغلت الحريه اللي الدوله أعطتهم إياها ، وصاربعضهم يطخ على الدوله نفسها ، وعلى زلمها ، وهات يا جق حكي على الفاضي ومش مليان ، وما خلو حدا من شرهم ، وكل يوم بيمسكو شل واحد وبينزلو فيه سلخ تا يهتري جلدو أو يدفع خاوه ، والسبب إنهم زعلانين منو ، أو مش عاجبهم شكلو ، أو مقهورين منو لإنو ناجح ، والخسران هو الوطن ، ويا ريت الدوله تفكر بقانون الزامي ومش شرفي و بس ، حتى توقف أي إنسان مهما كان موقعو عن التجريح ، وهيك منحمي حالنا والوطن كمان ، وكافي إنهم منصبين حالهم القاضي والجلاد ، وجابي الضرايب .أنا معاهم بدهم يكسبو لكن بالحلال .بعدين بيصيرو زي اللي بيحكو عليهم ، واللي هم رافضينهم

يا جماعه نفسي اقرا بهالمواقع الكلام اللي كانو الزلم يحكوه بالحصيده ، يعني طفل جوعان ، طالب جامعي بيدور على شغل ، عيله مستوره بدها مساعده ، صرنا ما بنقرا فيها غير واحد هبش ، واحد لطش ، واحد استغل موقعو الوظيفي ، أو موقعو الاجتماعي وأخذ اللي أخذو ، وطبعاً نص الحكي كذب ، والنص الثاني مش صحيح .

صدقوني ما بدافع عن السراقين الملاعين ، اللي الله لا يرحمهم ولا يقيم عنهم شده ، هذول اللي أكلو حق الوطن والمواطن ، لكن كمان لازم نعطي فرصه للقانون يوخذ مجراه ، إحنا بيحكمنا كلنا دستور وقانون ، وما بتحكمنا رغبات مواقع ، وما دام جلالة الملك قال إنو إحنا ماشيين بالإصلاح ، ورئيس الوزرا قال نفس الحكي ، وأكيد رح يكون هالحكي صحيح ميه بالميه ، وخلينا نستنى تا ينكشف المستور وساعتها يا مواقع دقو باللي واقع وإحنا معاكو .